18, జులై 2021, ఆదివారం

నా కార్ల గోల...


కారు కంటే ముందు బజాజ్ చేతక్ స్కూటర్, దానికంటే ముందు అద్దె సైకిల్ యొక్క విధివిధానాలు,ప్రకరణలు,అధ్యాయాల గురించి వ్రాయాలంటే మహాభారతమౌతుంది కాబట్టి విసిగించకుండా మూడుముక్కల రామాయణం  కట్టె,కొట్టె,తెచ్చె లాగా చెప్తాననుకుంటుంన్నారా.. అంత అదృష్టం మీకివ్వనుగాక ఇవ్వను :)


అది 1983 వ సంవత్సరం.హైస్కూల్ లో ఎనిమిదవ తరగతి చదువుతున్నా.మాఊరు మండలకేంద్రానికి రెండుకిలోమీటర్ల దూరముంటుంది. రోజూ ఊరినుంచి వెళ్ళి చదువుకొనే వాళ్ళందరూ కాళ్ళకు చెప్పులు లేకుండా బుద్ధి చెప్పేవారే... ఊరిలో అప్పటికికూడా సైకిల్ వున్న కుటుంబాలు చాలా చాలా తక్కువ. నాకు గుర్తుంన్నంత వరకూ మాఊరినుంచి సైకిల్ మీద బడికి వచ్చి చదువుకున్న వారు ఇద్దరే.. కొత్తూరు మేడం వెంకట నారాయణ, చాకలోల్ల నారాయణ. వీళ్ళిద్దరూ కూడా సైకిల్ లేకపొతే రోజూ మాకు బడికి పోయి రావడానికి సమయం వృధా అవుతుంది పదవతరగతి పాస్ అవ్వాలంటే సైకిల్ కొనివ్వమని ఇంట్లో పోరుబెట్టి కొన్నారు. అదిగో అప్పుడు పుట్టింది మనసులో కోరిక, ఎలాగైనా సైకిల్ నేర్చుకోవాలని. అప్పటికి మాఇంట్లో సైకిల్ లేదు.మరి ఎలా నేర్చుకోవడం? ఆ సంవత్సరం రామారావు తెలుగుదేశం పార్టీ పెట్టి ఒక ప్రభంజనం సృష్టిస్తున్నాడు. చాలా ఊర్లలాగే మాఊర్లోకూడా అప్పటిదాక కాంగ్రస్ లో వున్న ముప్పావు కుటుంబాలు తెలుగుదేశం జెండా భుజానికెత్తుకున్నారు.మాఇంటి వారితో సహా.

మా ఊరు పంచాయితీ కూడా కాదు. ప్రక్కన ఓ రెండుకిలోమీటర్ల దూరంలో వున్న గోకులం పంచాయితీలోకి వస్తుంది మాఊరు. మా ఊరివాళ్ళు ఓటువెయ్యాలంటే గోకులం పోవలసిందే. అలా  ఎలక్షన్ జరగ బోతున్న ఓ వారం ముందు చాలా తెలుగుదేశంకుటుంబాలు మా ఇంటి అరుగుమీద సమావేశమయ్యారు. ఊర్లో ఎవరెవరికి ఓటువుందో లెక్కలేసుకుంటూ తెలుగుదేశానికి ఎంత మెజారిటీ వస్తుందో నన్న ఊహాగానాలు చేసుకుంటూ సమావేశం జరుగుతుంది.ఇంతలో ఇవన్నీ కాదుగానీ అసలు ఓటుఎవరెవరికుందో తెలుసుకుందామని ఓటర్ల జాబితా గోకులం నుంచి తెప్పించుకొందామని ఓ నిర్ణయానికి వచ్చారు.మరి గోకులం ఎవరు పోతారు? 


రాజకీయాలు నీకెందుకురా అని బలవంతంగా నన్ను చదువుకొమ్మని ఓ మూల కూర్చో బెట్టి వున్నారు. పుస్తకంలో వున్న విషయాలకంటే వీళ్ళ లోకాభిరమాయణాన్ని ఓ చెవిలో వేసుకుంటున్న నేను దొరికిందిరా అవకాశం అనుకొని "నేను పోతానని" లేచి నిలబడ్డాను. అదిగో అప్పుడు ఆ అరుగుమీదున్న తిరుపతిరెడ్డి సైకిల్ తొక్కడం వచ్చా అంటే "ఓ బ్రహ్మాండంగా వచ్చని" చెప్పడంతో తొందరగా పొయ్యి ఓటర్ల జాబితా తీసుకురమ్మన్నారు. ఇంకేముంది సైకిల్ తీసుకొని అప్పటిదాకా అందరూ ఎలా సైకిల్ నడుపుతున్నారో గమనించి వుండటంతో నేనూ అలాగే దాన్నిఆచరణలో పెట్టాలని చూసి అందరూ చూస్తుండగా ఓ యాభై అడుగులదూరంలోనే క్రింద పడ్డ సైకిల్ మీద నేను పడ్డాను. పాపం మా తిరుపతిరెడ్డి గుండె గుభేల్ మన్నది :)


అదిగో ఆ తరువాత మళ్ళీ నాకు సైకిల్ ఇచ్చే సాహసం ఎవరూ చెయ్యలేదు కాబట్టి నేను ఇంటర్మీడియెట్ చదవడంకోసం ప్రక్కనున్న పట్టణానికి వచ్చేటంతవరకూ సైకిల్ నేర్చుకొనే అవకాశం దొరకలేదు. ఇంటర్మీడియెట్ మొదటిసంవత్సరంలో వుండగా అద్దెకు సైకిల్ తీసుకొని స్నేహితుల సహకారంతో నేర్చుకోవాలసి వచ్చింది.


ఇక రెండవ అంకం.ఉద్యోగమొచ్చి పెళ్ళై మకాం బొంబాయి అంధేరి నుంచి హైదరాబాదు లోతుకుంట కు మారింది. అప్పటిదాకా బస్సుల్లో అవస్థలు పడుతున్న మేము ఓ బండి కొనుక్కుందామనుకున్నాము. అప్పట్లో అనగా 1998 ప్రాంతంలో బజాజ్ చేతక్ చాలా ఆదరణ వున్న బండి. కుటుంబం వున్నదంటే వారింట్లో ఒక్క చేతక్ అన్నా వుండేది అలా బజాజ్ చేతక్ చేత వశీకరణ చేయబడ్డవాడినై రాణిగంజ్ నుంచి ఓ బండి కొన్నాను. అప్పటికి నాకు స్కూటర్ నడపడం రాదు కాబట్టి వేరేవారిచేత ఇంటిదాకా తెప్పించి ఓ గ్రౌండ్ లో నేర్చుకుంటూ క్రిందపడ్డాను. కాకపోతే ఈ సారి నేను క్రిందా బజాజ్ చేతక్ పైన :)


మూడవాంకం.ఇద్దరు పిల్లలు పుట్టి బజాజ్ చేతక్ మాకు చిన్నదైపోయింది. చిన్నపిల్లలతో ఎక్కడికి వెళ్ళాలన్నా అవస్థలు పడటం బాగా ఇబ్బందనిపించి ఓ కారుకొనాలని 2004 లో నిర్ణయించుకున్నాము. అప్పటికి మామకాం కూకట్ పల్లికి దగ్గర్లో వున్న వసంతనగర్. అప్పట్లోనే పెట్రోల్ ధరలు భరించడం కష్టం కావడంతో డీజిల్ ఇంజన్ కొనాలని "టాటా ఇండికా" కొని డ్రైవర్ చేత ఇంటికి తెప్పించాను. అప్పటికి మనకు కార్ నడపడం రాదు :). ఓ మూడునెలలు డ్రైవర్ ను పెట్టుకొని రోజూ ఆఫీస్ కు వెళ్ళి వస్తుండేవాడిని. అలా మొదటినెలలో నేర్చుకుంటూ ఓ దుర్మూహార్తాన ఆఫీసుకు బయలుదేరి వెళ్తూ ఓ "T" జంక్షన్ దగ్గర ఆగాల్సి వచ్చింది. అలా ఆగి వెళ్ళేటప్పుడు బ్రేక్ బదులు యాక్సిలరేటర్ తొక్కడంతో ఓ లారీ బాడీకి నా కారు పోయి గట్టిగా ముద్దుపెట్టుకొని ముందుభాగంలో ఓ చిన్న సొట్ట బడింది :) 


ఇక నాల్గవ అంకం. రెండువేల ఎనిమిదవ సంవత్సరం. కుటుంబంతో సహా మకాం అమెరికాకు మారింది.అప్పటికే హైదరాబాదు రోడ్లలో కారు సునాయాసంగా నడిపిన నాకు అమెరికాలో కారునడపడం ఓ లెక్కలోనిది కాలేదు.వచ్చిన వెంటనే చేతిలో లక్ష్మీదేవి వుండదు కాబట్టి మొదటి రెండునెలలు ఓ స్నేహుతుని దగ్గరున్న కారు వాడుకొని మూడోనెలలో అతను స్యూరిటీ గా వుండి నాకు ఒక కారు అప్పుతో ఇప్పించాడు. అలా అమెరికాలో నా మొదటి కారు "సెకండ్ హ్యాండ్ టయోటా సియన్నా". దాన్ని నడిపి నడిపి బోరుకొట్టడంతో ఈ కారుకేమన్నా ఐతే బాగుండని తలచినదే తడవుగా ఓ శుభముహూర్తాన పార్కింగ్ లాట్ లో వెళుతున్న నాకారును ఓ కొరియన్ అమ్మాయి కారును వేగంగా వెనుకకు తీయడంతో నా కార్ రెండు తలుపులు బాగా సొట్టబడి టోటల్ అయిపోయింది. హమ్మయ్య అనుకొని తరువాతి వారంలో "టయోటా హైలాండర్" కొన్నాను.


ఐదవాంకం. మా పెద్దమ్మాయి హైస్కూల్ కు రావడంతో మాకు రెండవకారు తప్పనిసరి అనిపించింది. పగలు నేను కారు తీసుకుపోతే పిల్లల యాక్టివిటీస్ కి మాకు ఇబ్బందిగా వుండేది.ఆ ఇబ్బందిని అధికమించడానికి నా భార్యకు 2012 లో డ్రైవింగ్ నేర్పించి రెండవకారు "సెకండ్ హ్యాండ్ హోండా అకార్డ్" కొన్నాము. 


ఆరవాంకం. 2020 లోపెద్దమ్మాయి చదువుపూర్తిచేసుకొని ఉద్యోగంలో చేరింది. కానీ కరోనా కారణంగా ఆఫీసుకు వెళ్ళే అవకాశం లేకపోవడంతో ఇంట్లోనుంచే పనిచేస్తున్నది. ఈ సంవత్సరం సెప్టంబరులో వాళ్ళకు ఆఫీసులు తెరిచి తప్పనిసరిగా కనీసం మూడురోజులు ఆఫీసుకు రావాలని చెప్పడంతో ఊరుమారడం తప్పటంలేదు. తను పనిచేసే ఆఫీసు మా ఇంటికి వంద కిలోమీటర్లుంటుంది.కాబట్టి మా పెద్దమ్మాయికి కారు అవసరమౌతుంది. ఇప్పటిదాకా మేము వాడుతున్న "హోండా అకార్డ్" ఆ అమ్మాయికిచ్చి ఓ రెండేళ్ళు దీన్ని వాడుకొని కొత్తకారుకొనుక్కోమని చెప్పాము. అదుగో అలా ఇప్పుడు మాకు మూడవ కారవసరమైంది.


ఏడవాంకం. మూడవకారు ఏది కొనాలా అన్న తర్జనభర్జనలు,యూట్యూబ్ వీడియోలు మొదలైనవన్నీ చూసి ఓ రెండువారాల పరిశీలన తరువాత నిన్న మూడవకారు మా ఇంటికొచ్చింది.
















8, ఫిబ్రవరి 2021, సోమవారం

శివపార్వతులనాట్యం...మంచుతుఫాను.

 శివపార్వతులు గంగవెఱ్ఱులెత్తి నృత్యం చేస్తే ఆ మంచుకొండలనుంచి జారిపడి మా ఊరిని పాల సముద్రం చేసేసింది.



24, డిసెంబర్ 2020, గురువారం

నాకూ ఒక టి.వి.యస్ కావాలి.... .. ఓ మూడుకోట్లు వెనకేసుకోవాలి :)

 స్కూటీలో పోలవరం స్టీల్‌...!!

స్టీల్, ఇసుక లాంటి భారీ మెటీరియల్‌ తరలించాలంటే ఎక్కడైనా డీసీఎం, లారీ లాంటి పెద్ద వాహనాలు తప్పనిసరి. ఓ ఇల్లు కట్టాలన్నా నిర్మాణానికి వాడే బరువైన ఇనుము, ఇతర మెటీరియల్‌ను పెద్ద వాహనంలోనే తరలిస్తారు. పోనీ కనీసం ట్రాక్టరైనా వాడతారు. కానీ పోలవరం లాంటి అతి పెద్ద ప్రాజెక్టు నిర్మాణంలో మాత్రం ద్విచక్ర వాహనాలపై టన్నుల కొద్దీ ఉక్కు తరలించారంటే నమ్మాలి మరి! ఇవే కాదు.. విచిత్రంగా ఇక్కడ ఆటోలు, కార్లలో వందల టన్నుల స్టీల్‌ తరలించినట్లు చూపించారు! సిమెంట్, ఇసుక, స్టీల్‌ తరలించడంలో రాయపాటి స్టైలే వేరు మరి..!! అసలు కొనుగోలే చేయని సరుకును అధిక ధరలకు కొన్నట్లు చూపించి ఏకంగా రూ.907.10 కోట్లను లూటీ చేయడం రాయపాటికి మాత్రమే సాధ్యమైంది. సీబీఐ ఫోరెన్సిక్‌ ఆడిట్‌లో విస్తుపోయే ఈ అక్రమాల బాగోతం బట్టబయలైంది. 

ఫోరెన్సిక్‌ ఆడిట్‌లో...
పోలవరం ప్రాజెక్టు, జాతీయ రహదారుల కాంట్రాక్టు పనుల పేరుతో 14 జాతీయ బ్యాంకుల నుంచి రూ.7,153.62 కోట్ల రుణం తీసుకున్న రాయపాటి తన సంస్థ ‘ట్రాన్స్‌ట్రాయ్‌’లో పనిచేస్తున్న వారి పేర్లతో ఏకంగా తొమ్మిది కంపెనీలను ఏర్పాటు చేసి నకిలీ కొనుగోళ్లతో రూ.6,202.82 కోట్లను మింగేశారు. ఇందులో రూ.350.49 కోట్లను రాయపాటి తన భార్య  లీలాకుమారి, సమీప బంధువు చెరుకూరి శ్రీధర్‌ వ్యక్తిగత ఖాతాల్లోకి నేరుగా మళ్లించి స్వాహా చేయడం ఫోరెన్సిక్‌ ఆడిట్‌లో బహిర్గతమైందని సీబీఐ తేల్చింది. ట్రాన్స్‌ట్రాయ్‌ తరఫున రాయపాటి సాంబశివరావు, చెరుకూరి శ్రీధర్, అక్కినేని సతీష్, లీలాకుమారి రుణం తీసుకుని చెల్లించకుండా మోసగించడంపై కెనరా బ్యాంక్‌ జనరల్‌ మేనేజర్‌ టి.వీరభద్రారెడ్డి ఈనెల 15న ఇచ్చిన ఫిర్యాదుతో సీబీఐ కేసు నమోదు చేసింది. గుంటూరు, హైదరాబాద్‌లోని రాయపాటి, చెరుకూరి శ్రీధర్, అక్కినేని సతీష్‌ ఇళ్లు, కార్యాలయాలపై  ఈనెల 18న సోదాలు నిర్వహించింది. ఎఫ్‌ఐఆర్‌లో రాయపాటి అక్రమాలను సీబీఐ బట్టబయలు చేసింది. 

సీబీఐ ఎఫ్‌ఐఆర్‌లో ప్రధానాంశాలు ఇవీ..
ప్రణాళికతో బ్యాంకుల దోపిడీ..
రాయపాటి 2001లో ఏర్పాటు చేసిన ట్రాన్స్‌ట్రాయ్‌ ఇండియా లిమిటెడ్‌(టీఐఎల్‌) జాతీయ రహదారులు, సాగునీటి ప్రాజెక్టుల నిర్మాణం లాంటి కాంట్రాక్టు పనులను చేపడుతోంది. 2013లో పోలవరం హెడ్‌ వర్క్స్‌ నిర్మాణాన్ని ట్రాన్స్‌ట్రాయ్‌ దక్కించుకుంది. కెనరా బ్యాంకు నేతృత్వంలోని 14 బ్యాంకుల కన్సార్షియం ట్రాన్స్‌ట్రాయ్‌కు రూ.9394.28 కోట్ల రుణం ఇచ్చేందుకు అంగీకరించింది. ఇందులో రూ.7153.62 కోట్ల రుణాన్ని రాయపాటి తీసుకున్నారు. రాయపాటి తన సంస్థలో పనిచేసే వారి పేర్లతో తొమ్మిది నకిలీ కంపెనీలను ఏర్పాటు చేసి వాటి నుంచి ఇనుము, సిమెంటు, కంకర, యంత్రాలు, వాహనాలు, పరికరాలు కొనుగోలు చేయకుండానే కొన్నట్లు చూపించి రూ.7153.62 కోట్లను బ్యాంకుల నుంచి తీసుకున్న రుణం నుంచి చెల్లించేశారు. ఆ తర్వాత ఆ తొమ్మిది సంస్థల నుంచి రూ.6,202.82 కోట్లను ట్రాన్స్‌ట్రాయ్‌ ఖాతాలోకి మళ్లించి స్వాహా చేశారు. 

నకిలీ కొనుగోళ్లు..
ట్రాన్స్‌ట్రాయ్‌లో పనిచేసే సుధాకర్‌బాబు పేరుతో పద్మావతి ఎంటర్‌ప్రైజెస్, మాజీ డైరెక్టర్‌ సాంబశివరావు మలినేని పేరుతో యూనిక్‌ ఇంజనీర్స్, వేములపల్లి హరీష్‌బాబు పేరుతో బాలాజీ ఎంటర్‌ప్రైజస్, కొరివి శివకుమార్‌ పేరుతో రుత్విక్‌ అసోసియేట్స్‌ను ఏర్పాటు చేయించిన రాయపాటి ఆ సంస్థల ఖాతాల్లోకి రూ.686.55 కోట్లను కనీసం జమ  చేయకుండానే అంతే విలువైన వస్తువులను ఆ సంస్థల నుంచి కొనుగోలు చేసినట్లు చూపి మింగేశారు.

ఇదిగో ఆ చిట్టా..
► పద్మావతి ఎంటర్‌ప్రైజెస్‌ నుంచి రూ.2,172.75 కోట్ల విలువైన వస్తువులు కొనుగోలు చేసినట్లు రాయపాటి చూపించారు. కానీ పద్మావతి ఎంటర్‌ప్రైజెస్‌ టిన్‌ నెంబర్‌ 36200282035 పరిశీలిస్తే ఆ టిన్‌ నెంబర్‌తో ఎలాంటి సంస్థ ఏర్పాటు కాలేదని ఫోరెన్సిక్‌ ఆడిట్‌లో వెల్లడైంది.
► బాలాజీ ఎంటర్‌ప్రైజెస్‌ సంస్థ రూ.1,865.47 కోట్ల వస్తువులను ట్రాన్స్‌ట్రాయ్‌ కొనుగోలు చేసినట్లు చూపింది. కానీ పద్మావతి ఎంటర్‌ప్రైజెస్‌ సంస్థ టిన్‌ నెంబర్‌తో ఈ కొనుగోళ్లు జరిపినట్లు ఫోరెన్సిక్‌ ఆడిట్‌లో స్పష్టమైంది.
► రుత్విక్‌ అసోసియేట్స్‌ నుంచి రూ.1925.86 కోట్ల విలువైన వస్తువులను కొనుగోలు చేసినట్లు చూపారు. కానీ అలాంటి లావాదేవీలు జరగలేదని ట్రాన్స్‌ట్రాయ్‌ రికార్డుల్లో వెల్లడైంది. దీన్ని బట్టి అవన్నీ బోగస్‌ లావాదేవీలన్నది స్పష్టమవుతోంది.
► యూనిక్‌ ఇంజనీర్స్‌ నుంచి సంస్థ యజమాని ఎం.సాంబశివరావు పాన్‌ నెంబర్‌ ఏఎఫ్‌కేపీఎం1706ఎల్‌నే టిన్‌ నెంబర్‌గా చూపించి రూ.672.12 కోట్ల విలువైన వస్తువులు కొన్నట్లు చూపారు. ఈ సంస్థ నుంచి కొనుగోలు చేసిన సరుకును తరలించడానికి వినియోగించిన వాహనాల నెంబర్లను పరిశీలిస్తే అందులో అధిక శాతం ద్విచక్ర వాహనాలుగా తేలింది.

సబ్‌ కాంట్రాక్టర్ల ముసుగులో రూ.1,527.10 కోట్లు స్వాహా..
బోగస్‌ సంస్థల నుంచి కొనుగోలు చేయకుండానే చేసినట్లు చూపిన ఇనుము, సిమెంటు, కంకర, వాహనాలు లాంటి వాటిలో రూ.1,753.82 కోట్ల విలువైన సరుకు నిల్వ ఉన్నట్లు ట్రాన్స్‌ట్రాయ్‌ చూపించింది. ఇందులో ఒక్క పోలవరం ప్రాజెక్టు వద్దే రూ.1,527.10 కోట్ల విలువైన సామగ్రి నిల్వ చేసినట్లు చూపారు. ఇంత భారీ ఎత్తున ఒక ప్రాజెక్టు వద్ద సరుకును ఎలా నిల్వ చేస్తారని సీబీఐ అధికారులు ఆశ్చర్యపోయారు. పోలవరంలో పనులు  సబ్‌ కాంట్రాక్టర్లే చేశారు. ట్రాన్స్‌ట్రాయ్‌ తట్టెడు మట్టి కూడా ఎత్తలేదు. అలాంటి ట్రాన్స్‌ట్రాయ్‌ రూ.1,527.10 కోట్ల విలువైన సామగ్రిని పోలవరం పనుల కోసం కొనుగోలు చేసి నిల్వ ఉంచినట్లు చూపడమంటే ఆమేరకు దోపిడీ చేసినట్లు స్పష్టమవుతోంది.

దొంగ లెక్కలతో రూ.907.10 కోట్లు లూటీ..
ట్రాన్స్‌ట్రాయ్‌ సంస్థ ఆదాయ, వ్యయాలపై బ్యాలెన్స్‌ షీట్‌ను దొంగ లెక్కలతో భారీగా పెంచేసింది. వస్తువులు కొనకుండానే అధిక ధరలకు కొనుగోలు చేసినట్లు తప్పుడు రికార్డులు సృష్టించి రూ.907.10 కోట్లను రాయపాటి లూటీ చేసినట్లు ఫోరెన్సిక్‌ ఆడిట్‌లో వెల్లడైంది. ట్రాన్స్‌ట్రాయ్‌ 24 ఎక్సవేటర్‌లను రూ.34.06 కోట్లకు కొన్నట్లు చూపింది. కానీ 8 ఎక్సవేటర్‌లను వోల్వో ఇండియా నుంచి కొనుగోలు చేసింది. మిగతా 16 కొనుగోలు చేయకుండానే కొన్నట్లు చూపించి నిధులు మింగేసింది. మరో 8 ఎక్సవేటర్లను రూ.14.67 కోట్లకు కొనుగోలు చేసినట్లు చూపింది. ఇందులో ఒకటి టాటా హిటాచీ, మూడు ఎల్‌అండ్‌టీ నుంచి కొనుగోలు చేసినట్లు చూపింది. మిగతా నాలుగు కొనుగోలు చేయకుండానే కొన్నట్లు చూపించి నిధులు కాజేసింది. పది టిప్పర్లను టాటా సంస్థ నుంచి కొనుగోలు చేసినట్లు ట్రాన్స్‌ట్రాయ్‌ చూపింది. నిజానికి ఐదు వాహనాలను మాత్రమే కొనుగోలు చేసి మిగిలిన ఐదు వాహనాలకు ఇవే ఛాసిస్‌ (లారీ బాడీ నెంబర్‌) నంబర్లు చూపించి నిధులను మింగేసింది. వాటికి రిజిస్ట్రేషన్‌ కూడా చేయించకపోవడం గమనార్హం.  

నకిలీ వాహనాలు రయ్‌.. రయ్‌!
► యూనిక్‌ ఇంజనీర్స్‌ అనే సంస్థ నుంచి 25.50 టన్నుల 10 ఎంఎం ఇనుప కడ్డీలను కొనుగోలు చేసి ఏపీ 12వీ 5408 నెంబరు బజాజ్‌ ఆటోలో పోలవరం పనులకు తరలించినట్లు చూపించారు. 
► పద్మావతి ఎంటర్‌ప్రైజెస్‌ నుంచి 16.60 మెట్రిక్‌ టన్నుల 10 ఎంఎ ఇనుప కడ్డీలను కొనుగోలు చేసి కేఏ 03 6894 నంబర్‌ కలిగిన టీవీఎస్‌ స్కూటీలో     తరలించినట్లు చూపారు. ఇంత ఇనుము ఓ చిన్న స్కూటీపై తరలించగలగడం ఎవరికైనా అసాధ్యమే కానీ ఘనాపాటి రాయపాటికి మాత్రం కాదు.  ఒక్క రూపాయి పెట్టుబడి పెట్టకుండా రూ.450 కోట్ల షేర్లు ఎవరైనా కొనగలరా? ట్రాన్స్‌ట్రాయ్‌లో రాయపాటి భార్య లీలాకుమారి, సమీప బంధువు చెరుకూరి శ్రీధర్‌లు రూపాయి పెట్టుబడి పెట్టకుండానే 2012 – 2014 మధ్య రూ.450 కోట్ల విలువైన షేర్లు కొన్నట్లు రికార్డుల్లో చూపించారు.  

ద్విచక్రవాహనాలపై అనేక మెట్రిక్‌ టన్నుల స్టీల్‌ తరలించినట్లు చూపిన నకిలీ బిల్లులు



9, డిసెంబర్ 2020, బుధవారం

త్రాగునీరు - అమెరికా వర్సెస్ భారతదేశం.

 

ఏలూరులో జరిగిన ఘటన దరిదాపుగా త్రాగునీరు కలుషితమవడం వలన జరిగివుండవచ్చని ప్రాధమికంగా ఒక నిర్థారణకు వచ్చినట్లే వుంది. కచ్చితమైన సమాచారం కావాలంటే మరో నాలుగైదురోజులు పట్టవచ్చేమో... కానీ ఈ దుర్ఘటన చదివిన తరువాత నాకు అమెరికా కుళాయి నీళ్ళ ని భారతదేశపు కొళాయినీళ్ళతో పోల్చాలనిపించింది. దీనికి ఒక కారణం కూడా వుంది. సాధారణంగా చాలామంది అమెరికాలో కొళాయి నీళ్ళే త్రాగుతారు. బాటిల్డ్ వాటర్ త్రాగరా అంటే త్రాగుతారు కానీ సగటు అమెరికన్ ఇంటి కొళాయిలో వచ్చే నీళ్ళే ప్రతిదానికీ వాడుతాడు. ఇంతకీ ఈ వివరణ ఎందుకంటే ఈ సంవత్సరం జూలై నెలలో మాయింటికి మున్సిపల్ వాళ్ళ దగ్గరనుంచి ఒక లెటర్ వచ్చింది. దాని సారాంశం ఏమిటంటే గత వారంనుంచి మీరుత్రాగే నీళ్ళలో క్లోరైడ్ శాతం మేము పోయిన సంవత్సరం పంపిన రిపోర్ట్ కంటే కొంచెం ఎక్కువగా వున్నదనీ, కానీ ఈ నీళ్ళు త్రాగడం వల్ల ఎటువంటి హానీ జరగదనీ, క్లోరైడ్ శాతాన్ని రిపోర్ట్ లో చెప్పిన గణాంకాలకు అనుగుణంగా తీసుకురావడానికి ప్రయత్నిస్తున్నామనీ ఒక ఉత్తరం పంపారు. మేము ఎందుకొచ్చిన గొడవలెమ్మని ఓ నెలపాటు అనగా మళ్ళీ వారు ఉత్తరం పంపేవరకూ ప్యూరిఫైడ్ బాటిల్ వాటర్ కొనుక్కుని త్రాగాము. ఇక్కడ మున్సిపాలిటీ వాళ్ళు ప్రతి సంవత్సరం ఒక నివేదిక ఇంటికి పంపుతారు. అందులో నీళ్ళలో ఏమైనా బాక్టీరియా వున్నాయా, హెవీ మెటల్స్ ఎంతశాతం వున్నాయి మొదలైన సమాచారమంతా పంపుతారు. 


ఇక్కడ ఇంటికి వచ్చే నీళ్ళు కలుషితం కావడం చాలా అరుదు. మన భారతదేశంలో లాగా పొలాల్లో / చేపల చెరువుల్లో పెస్టిసైడ్స్ నీళ్ళను త్రాగునీటి కాలువలు,నదుల్లోకి వదలరు. ప్రజానీకం కూడా బాధ్యత గుర్తెరిగి మసలు కుంటే మంచిది. ప్రభుత్వాలు కూడా మంచిణీటి చెరువులు కాలువల్లోకి ఇలా కలుషిత నీటిని వదిలే వారిపై కఠిన చర్యలు తీసుకోవాలి.


మా టౌన్ షిప్/ మున్సిపాలిటీ లో ౨౦౨౦ లో ప్రచురించిన నీటిలో అవశేషాల గణాంకాలు...





8, నవంబర్ 2020, ఆదివారం

1, నవంబర్ 2020, ఆదివారం

మీ స్నేహితులతో వారాంతం పార్టీలు చేసుకొనేటప్పుడు ఈ డ్రింక్ అందులో భాగంగా తప్పనిసరిగా వుండేట్టు చూసుకోండి

 

ఈ సారి మీ స్నేహితులతో వారాంతం పార్టీలు చేసుకొనేటప్పుడు ఈ డ్రింక్ అందులో భాగంగా తప్పనిసరిగా వుండేట్టు చూసుకోండి.ఒకసారి రుచి చూసినవారు దీనికోసం మరీ మరీ మళ్ళీ మళ్ళీ వేడుకుంటారు. అలాగని పోసేయకండి..ఒకటి లేదా రెండు డ్రింక్స్ తో సరిపెట్టండి. ఈ డ్రింక్ మీరు న్యూయార్క్ లాంటి నగరాల్లో తాగాలంటే కనీసం $18-25 డాలర్లవుతుంది. అదే మీరు ఇంట్లో చేసుకుంటే కనీసం యాభై డ్రింక్ లు వంద/నూటాఇరవైడాలర్లలోపు చేసుకోవచ్చు.

ఇది తయారుచేయడానికయ్యే ఖర్చు


1) 100% blue agave tequila - around $55-60

2) Orange liquor (Cointreau) - around $25

3) agave nectar -around $5

4) lemon/ice/salt - around $3

5) Cocktail Shaker Bar Tools Set - around $25


అంటే మీరు సుమారుగా $120 ఖర్చుపెడితే దరిదాపు యాభై డ్రింక్స్ తయారవుతాయి.అంటే ప్రతి వీకెండ్ తాగినా సంవత్సరం రోజులు ఢోకావుండదన్నమాట :)


mixing reatio :

2 oz 100% blue agave tequila 

3/4 oz Orange liquor (Cointreau)

3/4 oz *fresh* squeezed lime juice

Splash agave nectar/syrup (to taste)