ముందుగా బ్లాగ్ బాంధవులకు హ్యా పీ న్యూ ఇయర్
మరో నూతన దశాబ్దానికి స్వాగతం. సుస్వాగతం. గతించిన కాలం. కాలంలో మొలచిన జ్ఙాపకాలు మనసు పొరల్లో నిక్షిప్తమైనవి ఇంకిపోగా మిగిలినవి గాలి కొదిలేసి మరో నవ దశాబ్దికి స్వాగత తోరణాల అలంకారలతో 2010 కి సుస్వాగతం.
సంవత్స్రరం పాటూ మనం చేసిన పనులు దాని నుంచి అందుకున్న ఫలితాలు, అవి మంచా చెడా అని వేసుకున్న ప్రశ్నలు, ఆ ప్రశ్నలనుంచి ఉదయించిన సమాధానాలు మొదలైనవన్నీ మననం చేసుకొని నవ దశాబ్దికి స్వాగతమాలల ఆహ్వానించేముందు...
2009.. ఈ సంవత్స్రరం ప్రపంచానికి ఏమి ఇచ్చిందో నాకనవసరం. సమాజానికి ఏమిచ్చిందో కూడా నాకనవసరం. మరీ ఇంత స్వార్థమా అంటే, అవును. ఈ రోజు పూర్తిగా నా వ్యక్తిగత విశ్లేషణకు మాత్రమే. కాబట్టి
గడుస్తున్న సంవత్సరానికి చివరి పుట ఈ రోజు. మూడు వందల అరవై నాలుగు రోజుల ఉత్థాన పతనాలను ఈ ఒక్కరోజులో నిక్షిప్తం చేద్దామని చిరు ప్రయత్నం. వ్యక్తిగతం, సాంసారికం, ఉద్యోగం ఈ మూడు పార్శ్వాలున్న జీవితంలో మొదటిగా
ఉద్యోగం : ఇక్కడ సమ్మిళిత స్పందనలనే చెప్పుకోవాలి. ఆర్థికమాంద్యానికి అతలాకుతలమైన నగరాల్లో న్యూయార్క్ ఒకటి. కారణం ఈ సారి ఆర్థికమాంద్యానికి మూలం ఫైనాన్స్ కంపెనీలు. ఫైనాన్స్ మునిగిందంటే దానితో ముడిపడి వున్న ప్రతిదీ మునిగి పోతుంది. మా కంపెనీ అందులో ఒకటి. నేను చేరిన సమయానికి 38-40 మంది వున్న స్టాఫ్ 2008 లో 8౦ దగ్గరకు చేరి, 2009 అక్టోబఋ నాటికి 28 దగ్గర ఆగింది. మూడంచలుగా సాగిన ఈ లేఆఫ్ సునామీ ని తట్టుకొని కొంతలో కొంత బోనస్ చేజిక్కించుకోవడం ఆనందం. అలాగే నా ఇండియా ట్రిప్ సెలవులను [ ౩ వారాలు ] పెద్దమనసుతో పట్టించుకోక పోవడమూ ఆర్థికంగా కొంచెం వుపయోగ పడింది.ఇక పని విషయానికి వస్తే నవంబరు, డిసెంబరు అంత పని నేను ఉద్యోగంలో చేరినప్పటి నుండి కూడా చేసి వుండనేమో ;).
సాంసారికం : ఇది పోయిన సంవత్స్రరంలాగే ఏ ఒడిదుడుకులు లేకుండా చాలా ప్రశాంతంగా సాగింది. కానీ పనులు కూడా కొంచెం ఎక్కువయ్యాయనే చెప్పాలి.అర్థాంగి ఇంటిని నడిపిన తీరు కూడా శ్లాఘనీయం. దరిదాపు నెలరోజులు ఒక్కటి నెట్టుకొచ్చింది [ డ్రైవింగ్ కూడా రాకుండా]. అలాగే ఈ సంవత్సరం రకరకాల వంటలకు ప్రయోగశలగా నన్ను మార్చేసింది ;). దానితో సన్న తాటి మొద్దు లాగా వున్నోడిని పిప్పళ్ళ బస్తాలా తయారయ్యాను.
వ్యక్తిగతం : ఇక ఈ హృదయ స్పందనల చిరు సవ్వడి నా అంతరంగం. ఇది నాలోకం. ఈ లోకంలో విహరించేటప్పుడు నాకు నేనే.. సంసారమున్న సన్యాసిని. ఆనందం ఆస్వాదిస్తూ వ్రాసిన కవితలెన్నో. అంతరంగంలో గూడుకట్టుకున్న గువ్వపిల్లల కబుర్లని అక్షర రూపం ఇవ్వడానికి నేను ఎంచుకున్న మార్గం ఇది. ఈ బ్లాగు ద్వారా ఎన్నో స్నేహాలు. మరెన్నో గుండె లయలు. అలాగే మరెన్నో చర్చలు.
దీనికి తోడు హారం డెవలప్ మెంట్ నాకు ఎనలేని ఆత్మ సంతృప్తినిచ్చింది. మొదట సరదాగా మొదలెట్టి రకరకాల విన్యాసాలు చేసి ఓ తెలుగు సంకలని గా తీర్చి దిద్దడంలో నున్న కృషి బయటకు కనిపించక పోవచ్చు. దీని డెవలప్ మెంట్ లో భాగంగా ప్రియంగా నిద్రలేని రాత్రులు గడిపిన రోజులున్నాయి. తొలిదశలో క్రాలర్, పార్సర్ వ్రాస్తున్న రోజుల్లో. అలాగే సంధుల కోసం ఓ ఇంజన్ ను వ్రాస్తున్న రోజుల్లో కూడా చాలా సందేహాలు. గూగుల్ లో దీని మీద ఉన్న విజ్ఙానం తక్కువ. ఒక చిరు ఉపకరణిగా మొదలైన హారం ఈ సంక్రాంతి కి ఒక సంవత్స్రరం పూర్తిచేసుకుంటుంది. ఈ రోజుకు దినికి వచ్చిన హిట్లు ఐదున్నరలక్షలు.
ఇక పై రెండు పనులతో బందీనైపోయిన నాకు సహజంగానే కాల నియంత్రణ కష్టమైపోయింది. దాంతో ఆఫీస్ లో వర్క్ మీద శ్రద్ధ తగ్గింది. ఇంటి పనుల మీద శ్రద్ధ తగ్గింది. దీనికి తోడు వేరే బ్లాగులు చదవడలంలో వెచ్చిస్తున్న సమయం, కామెంట్ల సమయం ఇవన్నీ కలిసి కట్టుగా నా సమయాన్ని హరించి వేసాయి.
ఇక 2010 లో నాకంటూ ఏవో నిర్ణయాలు తీసుకొని ఆచరణలో పెట్టలేక కుళ్ళిపోవడం ఇష్టం లేదు కనుక ఏవో ఓ రెండు
౧) నో స్మోకింగ్ బోర్డ్ [ ఇది చదివిన వాళ్ళు నవ్వకండి ;)... ఏదో అలా ఇప్పటికి ఐదో రోజు పదో సారి నిర్విఘ్నంగా చేస్తున్నాను ]
౨) నా బ్లాగులో రేపటినుంచి కామెంట్లు వుండవు. అలాగే నా కామెంట్లూ వుండక పోవచ్చు.
ఇవి నేనూ పదిమందితో పబ్లిక్ లో పంచుకోవాలనుకున్నవి. మిగిలినవన్నీ నా 2009 డైరీ పేజీలకు మాత్రమే ... :)
