సిగిరెట్ మానడం ఎందుకంత కష్టం..... మనమంతటి దుర్బల మనసు కల వాళ్ళమా ?

బోధిసత్త్వునికి బోధిచెట్టుక్రింద జ్ఞానోదయమై బుద్ధుడై దేశాటనం చేసినట్టు ఈ పొగతాగే వళ్ళలో కూడా ఎప్పుడో ఒకసారి ఈ జ్ఞానోదయమవ్వాలి. ఔతుందా అని మీకు అనుమానం రావచ్చు. కచ్చితంగా అవుతుంది. ఒక్కసారి కాదు చాలా సార్లే అవుతుంది. కానీ అలా ఆ జ్ఞానోదయమైనప్పుడు దాన్ని భద్రంగా రెండు మూడు రోజులు ఉంచుకొని నాలుగోరోజో ఐదోరోజే అటకెక్కించేస్తుంటారు. దీనికి ప్రధాన కారణం నికోటిన్ అడిక్షన్ అని చెప్పుకోవచ్చేమో కానీ దానికంటే ముఖ్యకారణం మన మనసు/ మెదడు మీద మనకు అధికారం లేకపోవడమే. అంటే మనల్ని ఏదో శక్తి లొంగదీసుకొంటుందన్నమాట. ఇక్కడాశక్తి నికోటిన్ అనుకోవచ్చు. అందుకనే ఈ వ్యసనం మానడానికి దండయాత్ర మీద దండయాత్ర చేయాల్సి వస్తుంది. ఎప్పడిదాకా? గెలిచేదాకా !!!!... ఒక్కసారికే గెలుస్తామనుకుంటే అది అపోహ మాత్రమే... నేను మానేయాలని నిర్ణయించుకొన్నాక కూడా పదిహేను పెట్టలు కొని పడేసానంటే ఎన్ని దండయాత్రలు చేసానో చూడండి మరి. కానీ చివరి విజయం నాదే.

సందర్భం వచ్చింది కాబట్టి ఒక చిన్న అనుభవాన్ని వివరిస్తాను. మనము మొదటి నాలుగైదు రోజులు అసలు ఒక్క సిగిరెట్ కూడా ముట్టకుండా మన మనసుని నియంత్రించగలిగామనుకోండి, అప్పుడు కలిగే విజయగర్వం, మీ మనసుపై మీకున్న అధికారం నిజంగా వర్ణనాతీతం. ఈ విషయం సిగిరెట్ తాగే వాళ్ళకు మాత్రమే అర్థమవ్వగలదు. మీరు సాధించిన పురోగతి మిమ్మల్ని నిజంగా ఓ ఉన్నత స్థానంలో వున్నట్టు చూపిస్తుంది. అంటే మొదటి వారంలో మీరు దరిదాపుగా location based mental trauma నుంచి బయటపడినట్టే. నావరకు దీన్ని అధిగమించడమే కష్టంగా తోచింది. కానీ ఈ నికోటిన్ సిగ్నల్స్ రెండవ వారంలో పతాక స్థాయికి చేరి, "ఒక్కటంటే ఒక్క సిగిరెట్" వెలిగిస్తే ఏమౌతుంది. వెలిగించొచ్చు కదా అని ప్రియురాలు పిలిచినంత గోముగా [పెళ్ళాలు కాదులెండి.... పెళ్ళాం ఎక్కడైనా ప్రేమగా పిలుస్తుందా ;-) ] , రకరకాలుగా మనల్ని ప్రలోభాలకు గురిచేస్తుంది. కానీ మీరు ఆ ఒక్కసిగిరెట్ వెలిగించారా? ఔట్... మళ్ళీ మాములు స్థితికి ఒకటి రెండు రోజుల్లో వచ్చేస్తారు. అంటే ఎప్పటిలాగే గుప్పు గుప్పు మనిపిస్తుంటారన్న మాట. కారణం ఈ బుద్ధి ఉంది చూసారూ అది మహా చెడ్డది సుమండీ :-). ఈ ఒక్క సిగిరెట్ symptoms తీవ్రత తగ్గడానికి ఎంత సమయం పడుతుందో చెప్పలేను కానీ నాకైతే నాలుగువారాలదాకా ఉండేది. అంటే రెండో వారంలో రెండు మూడు రోజులనిపిస్తే నాలగవ వారంలో ఏదో ఒకరోజు ఓ రెండు నిముషాలనిపించేది. ఇప్పుడసలు లేదు. ఎవరైనా సిగిరెట్ త్రాగుతూ కనిపిస్తే జాలిగా చూడడం అలవాటైంది.

నాకలా.." ఒక్కసిగిరెట్ వెలిగిస్తే" ఏమౌతుంది అని అనిపించినప్పుడల్లా..." ఇన్ని రోజుల కష్టం బూడిదలో పోసిన పన్నీరౌతుంది కదా " అని అనుకుంటూ నేను నా ఐ-ఫోన్ లో రాసిపెట్టికున్న symptoms చూసుకొనేవాడిని ఆ ఐదారు నిముషాలు. మరో ముఖ్యవిషయం, మీరు స్మోకింగ్ మానేసిన వెంటనే చాలా వేగంగా రోజుకు కనీసం రెండు మూడు మైళ్ళన్నా నడవాలి. దీనివల్ల చాలా ఉపయోగాలున్నాయి. ఆ ఉపయోగాలు తరువాత చెప్పుకుందాం కానీ అతి ముఖ్యమైన ఉపయోగం "సిగిరెట్ త్రాగాలన్న ధ్యాసను తగ్గిస్తుంది".

ఓ చిన్న సిగిరెట్ మన శరీరంలో కలుగ చేసే రకరకాల మార్పులను తెలుసుకోవాలంటే ముందుగా మానవ శరీర నిర్మాణము గురించి తెలుసుకోవాలి. తెలుసుకోవాలంటే నాకు తెలిసిన అతికొద్ది వివరాలను మాత్రమే నేనందిమ్చగలను. ఇటువంటి టపాలకు సహజంగానే ఆదరణ తక్కువ కాబట్టి నా సమయాన్ని, మీ సమయాన్ని ఎక్కువగా వృధా చెయ్యకుండా కానిచ్చేస్తాను.

ఈ క్రిందనున్న బొమ్మలు జాగ్రత్తగా చూడండి.












మనం సిగిరెట్ తాగినప్పుడు నోటిగుండా పీలుస్తాము, వదిలేటప్పుడు నోటిగుండా, ముక్కు గుండా కూడా వదులుతాము. లేకపోతే అసలు మజా ఏముంటుంది చెప్పండి :-)




కాబట్టి ఇప్పుడు ఈ పొగ ప్రయాణించిన మార్గామేదో చెప్పగలరా? ఎందుకంటే ఆ మార్గంలో నున్న ప్రతి భాగాన్ని ఈ పొగ చెడగొట్టేస్తుంది. ఆ మార్గంలో ప్రతి భాగమూ ఒక పని చేస్తుంది. అది పాపం మనకెప్పటికప్పుడు.. ."సారూ... నువ్వు నన్ను కుళ్ళపొడుస్తున్నావు. నేను ముసలిదాన్నై పోతున్నాను. ఈవాళో రేపో అన్నంట్టుంది నా పరిస్థితి..ఓ సారి నా గురించి ఆలోచించమని " అబ్బే మనం వింటామా??? లెదు కదా....

దీనివల్ల వచ్చేరోగాలను తరువాతి టపాల్లో చూద్దాము.అప్పటిదాకా అక్కడున్న భాగాలను బట్టీయం వేయండి. వాటికి తెలుగు పేర్లు నాకు తెలియదు కాబట్టి ఆ ఆంగ్ల నామాలతోతే రాబోయే టపాలు వ్రాస్తాను.ఎవరైనా తెలుగుపదాలు తెలిపితే సంతోషిస్తాను.


వచ్చేటపాదాకా సెలవు.